Mar 13 | MCQ | STEP | Jesu Temiporu rena va 'e'u'eme Huni tisaiporu kwinu ijá 'wama Najuhi'ine ike kiama! Muna ikijahija 'ee sea ikijahija niho'o mavarasa'ina 'wamana.

Mark 13

Jesura Temiporui Tira'usahuna 'Waramajina

(Matiu 24:1-2; Ruku 21:5-6)

1 Jesu Temiporu rena va 'e'u'eme Huni tisaiporu kwinu ijá 'wama Najuhi'ine ike kiama! Muna ikijahija 'ee sea ikijahija niho'o mavarasa'ina 'wamana. 2 'Ejume Jesu ijá 'wama Sea ka'ene kimukaho túna'i tira'usaha para'eje kutejaru nami'eja 'wamana.

Ahia 'Ee Sisei Hihunijina

(Matiu 24:3-14; Ruku 21:7-19)

3 Jesu va'e huri'a Arivi Temiporu ropuna'ija'i Pitaho Jemisiho Joniho Enituruho ijá pu pu'úmo hiji'i hemi apoma ijá 'wava 4 Vea raki uneunechakija ija'ina re'eja? A aacha pina naju'irakúne nú ijí ka'avajaho sisea ka'ene rehunaka 'warumajaho nitu'u renu 'wa'ejakúnina 'wavara. 5 'Ejume Jesu ijá 'iama Ja hami ki'avara. Ea 'ahopo pisimia ve'ejakúne 'ee ea 'ahopo Nuni ihiji 'urahi'i Na Jesuna i'i kaivo ea mapoka pisimihuna. 7 Vea ka'ene ja ajira vehuna hene 'ee erapo ajira vehuni pinana 'warava he'avajaho oja pahiana'avara. Ajira rena vu'a ani ani re'ena kaivo mai'o 'urijaho paroa tu'u rehuna. 8 Kwakwa mapokakija mai'o ara'eja 'ee ararakija mai'o ara'eja. Ara kwaa 'aho'a mwevarivura roe 'ee ora vea re'ena. Ike uneunechakija ea hianahuni jihuni aneja. 9 'Enakaivo ja ojono hami 'ajo'avara. Ijihuni maijaho pu 'eka va'e hirisima puni nini va'e 'ee Sinakoku majikari hijihahuna. Ja Nuni eijihuna'e pu ja kamatia ka'ene 'ajohi'ini jihipuni nini 'eka va'akivi'i raka ka'ene ja kima hejujaho pu najahuna. 10 'Enakúne Godoni vu'a maiu'ina kwaa ara mapokakino naja'avara. 11 Pu ja 'eke 'otua ve'iro va'avajaho ja va'e uné raka ka'ene 'warahuniji pavwiha'avara. 'Enakaivo ja 'otua ve'iro ve'eje vu'a pina vwiha'avajaho ja pavwihahuna kaivo Godoni 'Aveni vaji'enakúne 'wara'avara. 12 Popwapo 'warave erapo 'u'uhwaha 'anie kwamasahe omahwapo 'warave erapo sesahwaha 'anie kwamasahe sesahwapo 'warave erapo opwaha 'anie kwamasahuna. 13 Ja Nuni eijihuna'e ea mapoka ja niho'o ki'avajaho senahuna. 'Enakaivo ea irara ija kisi 'unama va'e uri 'e'u'amajaho hu marahuna.

Sisei Ni'ima'uri Rehuni Veji'ina

(Matiu 24:15-28; Ruku 21:20-24)

14 Vei pini Sinakoku niho'o sisemaa pakavi'inijara tinia ka'ene panamihunijine namija ka'avajaho ea ka'ene Jutia hi'avajaho vekaji ni'aha kwino juhaha huri'i 'ahi va'avara. Ijihuni hahi ea irara ike ta'amajaho hami vwiha'avara. 15 Ei pini atahuri hi'amajaho hu paariha va'e sei vaji uneunecha pa'eka'amana kaivo aseha va'amana. 16 Ei pini juasi'i hi'amaji 'u'o pa'unama va'e ari huni ateha 'eka'amana kaivo ase'amana. 17 'Enakaivo vea kaji ea ka'ene hari'ina 'ee hariha musa iji'inijija niho'o pivusahuna. 18 'Enakaivo siporua 'o'irakúne siseakaho atuata veijaho pare'amana. 19 Vea kajino sisemaa ka'ene rehunijaho nitama Godira mwe'a 'ee akúpa vejume hinapena roajino sisea ija'ina parenajara rehuna. 'Enareje iji'a túna'a kú'o ija'ina parehuna. 20 Natohwijara vea kaji patu'ua ve'amajaho ei pina mai'o pahihuna. Ea ka'ene Hura iji pijihajihi puni hahi Hu veje vea kajaho tu'u rehuna. 21 Ei pini ja ijá 'i'amajaho Keka! Keriso ikena karena 'i'amajaho ja niho'o panimaa ro'avara. 22 Túna'i ea 'ahopo ira'atijino na Kerisona 'iave vu ea 'ahopo ira'atijino na poropeti 'iahuna. Pu ija'ina venareje aacha mapoka veje ea mapoka oja hianava kivi'i pisivie ea mapoka nimaa rohuna. Pu ea ka'ene Hura iji pijihajihija pisivihuna vo areri parehuna. 23 Hami heha! Mai'o raka ka'ene rehunijaho Na ni'waravuta.

Emaa Puni Harihijara Rohunijina

(Matiu 24:29-31; Ruku 21:25-28)

24 Sisemaa kajaho pa'are'eje vea na'ive 'ee masapa pahanahuna. 25 China jaheusunahe arihe akúpa puni harurijihija 'unirama usihuna. 26 'E'eje pu Emaa Puni Hariha ka'eje Hu 'imitia vaji harura ni'ima'ura niho'o hanana para'eje rohuna. 27 Ija'ina ve'eje Hu Huni 'ona oji'inijihija irechamia kamareje pu roe ea ka'ene Hura iji pijihajihija arara mapokijaho akúpa 'aha mwe'a vaja ichihichihi hijujija eparahuna.

Matakijara Najahajina

(Matiu 24:32-35; Maka 11:20-26; Ruku 21:29-33)

28 Na ja haa 'waravu. Ja tavo'a naheju'e kivujaho vea mara'i venu 'wavura. 29 Ijihuna'e vea ka'ene ike uneunechakipo reja ki'avajaho Hu niroe vwicha jiami rou roha. 30 Na nimaa ja 'waravu. Eaka kijahija maho'o pakwamasa'eje uneunecha ikijahija rehuna. 31 Akúpa mwe'ijaho pa'arehuna kaivo Nuni Irijaho papa'are'ena.

Ei Pini Veaho Vea Mukiji Hena Kahuna Pana

(Matiu 24:36-44)

32 Vea vecha rehunijaho ea pahena pakavu'e Godoni 'ona oji'inijija pahena pakavu'e Godoni Harihiji 'u'o pahena pakamu kaivo Amora vea kajaho Huhusuma hena kamuna. 33 Heha! Vea kajaho ja pahena pakavi'ini jihuna'e hina 'ajihi'i ka'avara. 34 Vea kajaho areri ei pini epuni ari va'i kaivo huni ara raname huni pwehija irechamiu'e kaukara raka raka ka'ene vehunijaho najahe 'ee vwicha 'ajohi'ina hami nia niri'i 'ajohuna'e 'waramana. 35 Nia hami niri'i hi'avara. Ijihuni maijaho sea anesurijara 'unama rohunijaho nusireina ho na'ia ririna ho 'u'ora 'umenujina ho vea nitu'eje rohuna. 36 Vejuro'i ja ne'eje hu roe tatatia ve'ena. 37 Na ja 'waravu ja'ina'e ea mapoka 'u'o 'waravo. Hami nia niri'i hi'avara.